Auðveldi úrræði í kynferðisbrotum

„Gerð verður heildstæð áætlun um það hvernig bregðast eigi við heimilisofbeldi og kynferðislegu ofbeldi hér á landi," segir Árni Magnússon félagsmálaráðherra sem hrint hefur af stað aðgerðaráætlun gegn heimilisofbeldi og kynferðislegu ofbeldi á Íslandi. Tillaga hans þess efnis var samþykkt í ríkisstjórn í gærmorgun. „Lagt er til að sjónum verði sérstaklega beint að börnum sem verða fórnarlömb kynferðislegs ofbeldis," segir Árni. „Skoða á sérstaklega hvernig styrkja megi barnaverndaryfirvöld, félagsmálayfirvöld, skóla, heilbrigðiskerfið, lögregluna og fleiri með það að markmiði að efla fræðslu og samhæfa vinnubrögð, verkferla og úrræði," segir hann. Aðgerðaráætlunin kemur í kjölfar þess að Stígamót, Samtök um kvennaathvarf, mannréttindaskrifstofa og fleiri lögðu síðasta vor fram drög að svona áætlun að fyrirmynd frá hinum Norðurlöndunum. Spurður hverju hann vonist til að áætlunin skili segir Árni: „Ég vonast til að þetta skili í fyrsta lagi markvissari viðbrögðum þegar upp koma vísbendingar um það að börn séu beitt kynferðislegu ofbeldi." Hann segir að aðgerðaráætlunin muni meðal annars ná inn á verksvið dómsmálaráðuneytis hvað varðar lögreglu og dómstóla, félagsmálaráðuneytis hvað varðar barnavernd og félagsþjónustu, heilbrigðisráðuneyti hvað varðar sjúkrahús og heilsugæslu og menntamálaráðuneytið út frá skólunum. „Það hefur verið gagnrýnt að áætlun af þessu tagi sé ekki til og fólk viti ekki hvernig það eigi að bregðast við og hvert það eigi að leita þegar grunur um kynferðisofbeldi vaknar. Meiningin er að ná utan um það," segir Árni. Gert er ráð fyrir því að áætlunin liggi fyrir í mars en Árni segir óvíst hvenær hrinda megi henni í framkvæmd. Það fari eftir umfangi og aðstæðum. „Umræðan undanfarna daga hefur óneitanlega vakið okkur öll til meðvitundar um kynferðisofbeldi gegn börnum og vil ég þakka þeim sem þar hafa gengið á undan fyrir kjark sinn. Það hefur óneitanlega haft áhrif," segir Árni.