Bílastyrkur bundinn lögheimili

Hreyfihamlaðir og blindir fá ekki styrk frá Tryggingastofnun til bílakaupa nema að ökumaður bílsins sé með lögheimili á sama stað og þeir sjálfir. Þeir sem ekki geta ekið sjálfir sökum fötlunar sinnar en eiga rétt á bílastyrk frá Tryggingastofnun þurfa að vera með lögheimili á sama stað og sá sem ætlar að aka bílnum fyrir viðkomandi. Þessu komst Bergvin Oddsson, nemandi í Menntaskólanum við Hamrahlíð að fyrir skömmu. Hann segir að hann og kærasta hans hafi ætlað að sækja um bílastyrk hjá Tryggingstofnun þar sem hann á rétt á því sökum blindu. Hann fékk synjun á þeim forsendum að þau hefðu ekki sama lögheimili. Tryggingastofnun vinnur eftir reglum frá heilbrigðis- og tryggingaráðuneytinu við afgreiðslu umsókna um bílastryk og hafa ekki heimildir til að víkja frá þeim.Ragna Haraldsdóttir, fulltrúi hjá Tryggingastofnun, sagði að þegar einstaklingar geta ekki ekið sjálfi væri ákvæði í reglugerð að það sé heimilt að heimilismenn keyri bílinn. Ekki sé mögulegt fyrir þá sem búa einir að fá bílastyrk. Bergvin er ósáttur við þessar reglur enda þýðir það að þeir sem búa einir geta ekki fengið styrkinn. Þá liggur í augum uppi að til dæmis hann ferðast meira með kærustunni sinni en foreldrum. Hann hefur sent inn nýja umsókn þar sem foreldrar hans eru skráðir ökumenn en hann hefur lögheimili hjá þeim. En býr hann á sama stað og foreldrar hans.