Fær að leiða fram vitni

Hæstiréttur hefur samþykkt kröfu Lúðvíks Gisurarsonar um að fá að leiða fram vitni sem varpað gætu ljósi á meint ástarsamband móður hans og Hermanns Jónassonar, fyrrverandi forsætisráðherra og lögreglustjóra í Reykjavík. Lúðvík heldur því fram að Hermann hafi verið faðir hans og eru vitnaleiðslurnar liður í viðleitni hans til að fá lífsýni úr Hermanni heitnum. Málið sem um ræðir er um margt sérstakt. Í sumar sem leið fékk Lúðvík nokkur Gissurarson staðfest með DNA rannsókn að maðurinn sem hann hafði verið kenndur við frá fæðingu, árið 1932, Gissur Bergsteinsson, hefði ekki verið faðir hans. Niðurstaðan kom Lúðvík þó ekki á óvart enda var tilefni DNA rannsóknarinnar að hans sögn að sanna að Hermann Jónasson, fyrrverandi forsætisráðherra sem nú er látinn, hafi verið faðir hans en ekki Gissur. Í kjölfarið höfðaði Lúðvík mál gegn börnum Hermanns, Steingrími Hermannssyni, fyrrum forsætisráðherra, og systur hans, þar sem farið var fram á að kanna hvort lífssýni úr Hermanni væru til í geymslu sem nota mætti til að sannreyna meint rétt faðerni Lúðvíks. Héraðsdómur hafnaði því og sömuleiðis að Lúðvík gæti fengið að leiða vitni fyrir dóm sem varpað gætu ljósi á samband móður hans og Hermanns Jónassonar, en eiginkona Hermanns og móðir Lúðvíks voru náfrænkur. Hæstiréttur er því þó ósammála og því munu vitnin verða leitt fyrir héraðsdóm til að varpa ljósi á hvort Hermann og móðir Lúðvíks hafi þekkst og hugsanlega átt í sambandi á þeim tíma. Lúðvík heldur því fram að móðir hans og Hermann hafi átt í ástarsambandi þegar móðir hans starfaði sem ritari Hermanns sem þá var lögrelgustjóri í Reykjavík. Maðurinn sem Lúðvík fékk í sumar staðfest með rannsókn að væri ekki rétti faðir hans, Gissur Bergsteinsson, var stuttu eftir fæðingu Lúðvíks, árið 1935, skipaður hæstaréttardómari af Hermanni Jónassyni, sem þá gengdi embætti dómsmálaráðherra jafnhliða embætti forsætisráðherra.