Sífellt fleiri í framhaldsnám

Aldrei hafa fleiri útskrifast úr námi á háskólastigi á Íslandi og á skólaárinu 2003 - 2004. Sama má segja um útskrifaða nema af framhaldsskólastigi. Örlítil fækkun er þó í útskrift nýstúdenta en sífellt fleiri útskrifast með stúdentspróf verkgreina og viðbótarnám til stúdentsprófs að loknu starfsnámi. Þetta kemur fram í fréttatilkynningu sem Hagstofan sendi frá sér í dag. Alls útskrifuðust 3.165 nemendur með 3.197 próf úr háskóla skólaárið 2003 til 2004. Alls útskrifuðust 15 færri nemar sem nýstúdentar það ár en þrátt fyrri það, hafa aldrei eins margir nemar útskrifast úr námi af framhaldsskólastigi eða 4.736 nemar með 5.212 próf. Flestir nemar sem útskrifast af framhaldsskólastigi útskrifast með stúdentspróf. Nemum með stúdentspróf verkgreina og viðbótarnám til stúdentsprófs að loknu starfsnámi hefur þó farið fjölgandi hin síðari ár en alls voru 340 nemar sem útskrifuðust með slík próf skólaárið 2003 til 2004. Athygli vekur að konur eru 64,4% þeirra sem útskrifast með próf á háskólastigi og karlar 35,6% útskrifaðra. Svipaða sögu má segja um kynjahlutfall meðal úrskrifaðara nema af framhaldsskólastigi en skólaárið 2003 til 2004 voru konur 76,7% af fjölda tvítugra það ár en karlar 44,5% af fjölda tvítugra. Þessu er þó öðruvísi farið í iðnámi en tæplega fjórir af hverjum fimm nemum sem ljúka sveinsprófi eru karlar.