Óljós framtíð Viktors Bjarka

Viktor Bjarki Arnarsson, sem lék með Fylki í Landsbankadeildinni í sumar, er enn samningsbundinn Víkingi en hann er á lánssamningi hjá Fylki. Að óbreyttu ætti hann því að verða leikmaður Víkings en Viktor er þó ekki viss um hver niðurstaða hans verður. "Ég á eftir að ræða þessi mál við forráðamenn Víkings. En ég geri ráð fyrir því að þeir vilji ganga frá samningum við nýjan þjálfara áður en niðurstaða fæst í leikmannamálin." Sigurður Jónsson hætti fyrir skemmstu sem þjálfari Víkings og þykir líklegt að Magnús Gylfason, fyrrverandi þjálfari KR og ÍBV, muni taka við Víkingi. Grétar Sigfinnur Sigurðsson var líkt og Viktor Bjarki á lánssamningi í sumar og því leit út fyrir að Víkingur myndi fá góðan liðsstyrk fyrir næstu leiktíð. En eftir að Sigurður ákvað að hætta sem þjálfari Víkings virðist sem áhugi þessara tveggja sterku leikmanna til þess að koma aftur til Víkings sé orðinn að engu. "Það voru óneitanlega mikil vonbrigði að Sigurður hafi hætt. Hann er frábær þjálfari og góður félagi þar að auki. Eins og staðan er núna þá reikna ég frekar með því að vera áfram hjá Fylki. En annars kemur það bara í ljós hvað stjórn Víkings ætlar að gera í leikmanna- og þjálfaramálum."