Fatlaðir lyfta á Lækjartorgi

Þandir vöðvar, þrútnar æðar, öskur og grettur verða allsráðandi á Lækjartorgi í dag þegar tíu aflraunamenn úr röðum fatlaðra kljást í keppninni um sterkasta fatlaða mann heims ársins 2005. Íþróttafélag fatlaðra stendur að mótinu, sem haldið í þriðja sinn. Kristberg Jónsson hefur titil að verja í flokki standandi en Finninn Tahvo Jauhojärvi freistar þess að verja titil sinn í flokki sitjandi, það er, þeirra sem nota hjólastóla. "Ekkert annað en sigur kemur til greina," segir Kristberg kokhraustur en viðurkennir að pressan sé á honum. "Keppinautar mínir ætla að hefna síðan síðast og gera allt til að sigra mig." Kristberg hefur æft vel að undanförnu, í tvo tíma á dag, og er hvergi banginn. Nokkrir keppendur frá Íran hugðust taka þátt í mótinu en ekkert varð úr þar sem þeir fengu ekki vegabréfsáritun í tæka tíð. Eru þeir þegar staðráðnir í að keppa að ári og munu þá eflaust setja skemmtilegan svip á mótið. Arnar Már Jónsson, aflraunamaður og þjálfari hjá Íþróttafélagi fatlaðra, hefur veg og vanda af mótinu, ásamt Magnúsi Ver Magnússyni margföldum aflraunameistara. Hann hvetur fólk til að fylgjast með enda horfur á spennandi keppni. "Fólk hefur líka gott af að sjá hvað þessir menn geta gert þrátt fyrir fötlunina," segir hann en keppt er í sömu greinum og í Sterkasti maður heims, þær hafa aðeins verið aðlagaðar fötluðum. Keppnin hefst á Lækjartorgi klukkan 14 í dag og er framhaldið við Fjörukrána í Hafnarfirði klukkan 13 á morgun. Lokagreinarnar fara svo fram í Íþróttahúsi fatlaðra í Hátúni, síðdegis á morgun. Kristberg Jónsson er spenntur fyrir keppninni en hvetur fyrirtæki til að styrkja fatlaða aflraunamenn svo þeir geti æft enn meira og betur. "Þetta er svo dýrt fyrir okkur," segir hann en hver króna fer í sportið. "Ég hef fengið litla styrki hér og þar en þeir mættu vera fleiri. Ég bið ekki um mikið," segir Kristberg, sterkasti fatlaði maður heims.