14 ára ráðherradómi Davíðs lýkur

Ríkisráðsfundur á Bessastöðum klukkan tvö í dag markar endalok á fjórtán ára ráðherradómi Davíðs Oddssonar og pólitískum ferli sem spannar áratugi. Ráðherraskipti verða í þremur ráðuneytum. Davíð Oddsson utanríkisráðherra stígur upp úr ráðherrastól sínum í dag á ríkisráðsfundi að Bessastöðum og í kjölfarið verða ráðherraskipti í þremur ráðuneytum. Í utanríkisráðherrastólinn sest Geir H. Haarde, fjármálaráðherra en Árni Mathiesen sjávarútvegsráðherra tekur við fjármálaráðuneytinu. Einar K. Guðfinnsson er nýliði í ráðherraliði ríkisstjórnarinnar en hann verður sjávarútvegsráðherra. Með þessum breytingum lýkur löngum ferli Davíðs Oddssonar sem ráðherra í ríkisstjórn Íslands. Hann gegndi starfi forsætisráðherra frá 13. maí 1991 til 15. september 2004 eða í 13 ár. Jafnhliða forsætisráðherratíð sinni sat Davíð sem ráherra Hagstofu Íslands. Frá 15. september 2004 hefur Davíð gegnt starfi utanríkisráðherra og mun, eins og kunnugt er, nú hverfa til starfa sem seðlabankastjóri. Fréttablaðið hélt því fram í morgun að hádegisverðarboð sem halda átti á undan ríkisráðsfundinum í dag hefði verið blásið af. Að sögn Fréttablaðsins var skýringin sú að Davíð Oddsson hefði ekki séð sér fært að komast í boðið. Fréttastofa Stöðvar tvö og Bylgjunnar fékk þau svör hjá Bolla Þór Bollasyni, ráðuneytisstjóra forsætisráðuneytisins, að skýringa megi fremur leita í því að landbúnaðarráðherra, Guðni Ágústsson, er ekki væntanlegur til landsins fyrr en klukkan eitt. Allir ráðherrar verða að sitja ríkisráðsfundi og því hafi fundinum verið frestað til klukkan tvö og ekkert orðið af matarboðinu.