Payton á leið til Miami Heat

Leikstjórnandinn Gary Payton, sem lék með Boston Celtics í fyrra, er á leið til Shaquille O´Neal og félaga í Miami Heat ef marka má nýjustu fréttir frá Bandaríkjunum. Samnnigur hans mun verða til eins árs og ekki er búist við að samningurinn hljóði upp á meira en lágmarkslaun, enda eru peningar ekki það sem Payton er á höttunum eftir. Miami missti aðal leikstjórnanda sinn Damon Jones í burtu í sumar, en hefur nú fengið tvo aðra í hans stað, sem í sameiningu ættu að reynast liðinu mikill happafengur. Áður hafði liðið fengið Jason Williams frá Memphis Grizzlies, en nú fær liðið til sín hinn reynda Gary Payton, sem spilaði einmitt með Shaquille O´Neal hjá Los Angeles Lakers á tímabilinu 2004, þegar liðið tapaði í úrslitum fyrir Detroit Pistons. Gary Payton lék lengst af ferlinum með Seattle Supersonics, en hefur síðan verið hjá Milwaukee, Los Angeles Lakers og nú síðast Boston Celtics. Meðaltöl hans yfir ferilinn eru 17,2 stig, 7,2 stoðsendingar og 2 stolnir boltar og ætti reynsla hans að koma að góðum notum hjá Miami í vetur, en liðið er staðráðið í að verða NBA meistari.