Tók ákvörðunina einn

"Það veit enginn hvernig flokkurinn verður án Davíðs," segir Einar Oddur Kristjánsson, þingmaður Sjálfstæðisflokksins. "Davíð tók þessa ákvörðun einn og við trúum því og treystum að hann hafi verið að meta það rétt. Ég hef engar forsendur til að meta að svo hafi ekki verið." Spurður að því hvernig honum lítist á nýjan sjávarútvegsráðherra, Einar K. Guðfinnsson, sem kemur úr sama kjördæmi og Einar Oddur segist hann hljóta að vera ánægður með það. Einar Oddur segir að það verði ekki verkefni Einars K. að bæta hag Vestfirðinga sérstaklega, "en hann er mikill kunnáttumaður á þessu sviði og ég treysti honum mjög vel".