Grænmetisuppskera góð í ár

Grænmetisuppskera hjá garðyrkjubændum í Reykholtsdal hefur verið mjög góð í sumar. Þeir kvarta þó undan lélegu verði og óttast aukið framboð. Júní var mjög sólríkur og tómatarnir kunnu vel að meta það því uppskeran var þá með eindæmum góð. Uppskerutímanum fer þó að ljúka í Vígarði í Reykholtsdal. Sveinn Andrésson, garðyrkjubóndi þar á bæ, segir tvo og hálfan mánuð eftir í uppskeru og þá sé þetta búið hjá þeim sem ekki séu með uppskeru. Spurður um það hvernig garðyrkjubændur hafi það nú segir Sveinn að þeir hafi það ágætt eins og er en framtíðin sé ekkert alltof björt. Það sé hins vegar eins og það hafi verið undanfarin ár, upp og niður. Spurður um verðið segir hann það hafa verið lágt í ár og virðast fara lækkandi því framleiðslan sé að aukast og markaðurinn stækki lítið. Sveinn hefur áhyggjur af vaxandi framboði. Hann hafi heyrt að það komi hugsanlega inn sex þúsund fermetrar í tómötum á næsta ári sem sé aukning um á 150-200 tonn. Það sé ansi mikil aukning á íslenskum markaði sem sé um 1300 tonn. Spurður hvað það þýði fyrir hann segir hann að þá fái hann minna fé, minni beingreiðslur og lægra verð og kannski verði offramboð á tómmötum. Spurður hvort hann komi til með að lifa af þessu í framtíðinni segist Sveinn vona það, hann sé ekkert tilbúinn að gefast upp. Duglegur maður eigi að geta lifað þetta af.