Klifruðu upp í byggingarkrana

Þrettán mótmælendur voru handteknir eftir að þeir fóru inn á byggingarsvæði álvers Alcoa í Reyðarfirði á ellefta tímanum í gærmorgun. Starfsmenn urðu varir við mótmælendurna laust fyrir klukkan hálf ellefu í gærmorgun og var lögregla umsvifalaust kölluð til að sögn Björns S. Lárussonar, samskiptafulltrúar Bechtel, sem stendur að byggingu álversins. Lögregla kom fljótlega á vettvang og handtók í kjölfarið tíu mótmælendanna. Ein kona og tveir karlmenn klifruðu hins vegar upp í byggingarkrana og voru þar fram eftir degi. Kom sá síðasti ekki niður fyrr en eftir klukkan fjögur, en þá var komin hellirigning. Fólkið var vel búið og hafði með sér nesti að sögn Ólafs Páls Sigurðssonar, talsmanns mótmælenda. Þá höfðu þau með sér borða með áletruninni "Alcoa græðir - Íslandi blæðir" sem hengdur var uppi í kranann. Stöðva þurfti alla starfsemi á byggingasvæðinu um fjögurra klukkustunda skeið meðan leitað var að mótmælendum að sögn Björns. "Svæðið er hættulegt og var því rýmt af öryggisástæðum," segir hann. Talsvert fjárhagstjón hlaust af töfum á framkvæmdum að sögn Björns. Mótmælendur verða þó ekki kærðir að því er fram kemur í fréttatilkynningu frá Alcoa. Mótmælendur segja fleiri aðgerða að vænta, sem beinist gegn Alcoa og sambærilegum fyrirtækjum, bæði hérlendis og erlendis. Þeir krefjast þess að byggingu álvers í Reyðarfirði verði stöðvuð. "Tilgangur mótmælanna er að senda skýr skilaboð til álframleiðenda heimsins að þeir eru óvelkomnir hingað til lands," segir Ólafur Páll. Á annan tug lögregluþjóna tóku þátt í aðgerðunum. Lögregluþjónar á Eskifirði og Neskaupsstað fengu liðsstyrk frá Eglisstöðum og sérsveitarmönnum frá Ríkislögreglustjóra. Einn Íslendingur var í hópi þeirra sem handteknir voru, en aðrir eru erlendir. Ekki lá ljóst fyrir í gærkvöld hvað gert verður við mótmælendurna, en þá voru þeir enn í haldi lögreglu.