Meintur kinnhestur til á myndbandi

Atvikið þar sem Hreimi Erni Heimissyni og Árna Johnsen lenti saman á þjóðhátíð í Vestmannaeyjum er til á myndbandi. Myndbandið fæst þó ekki sýnt - að sögn til að vernda Vestmannaeyjabæ. Árna og Hreimi ber engan veginn saman um hvað gerðist. Stöð 2 hefur óskað eftir að fá að sýna myndbandið en Hreimur sakar Árna um að hafa slegið sig í andlitið af engu tilefni. Eigendur myndbandsins eru að gera heimildarmynd um þjóðhátíð í Eyjum og neita að láta það af hendi, þótt það sýni í raun hvað gerðist. Þeir segjast þurfa að vernda Vestmannaeyjarbæ en myndin er unnin í samstarfi við hann. Hreimur Örn vill að myndbandið verði sýnt. Hann skorar á þá sem hafa myndbandið undir höndum að koma fram með það því þarna sé um sönnunrgagn að ræða. Páll Scheving Ingvarsson, meðlimur Þjóðhátíðarnefndar, sagði einnig í samtali við fréttastofu að hann vildi að mynbandið yrði sýnt opinberlega. Hann telur nauðsynlegt að úr því fáist skorið hvað raunverulega hafi gerst því umræðan geri ekkert annað en að skaða þjóðhátíðina. Árni Johnsen segir í yfirlýsingu í dag að sér hafi ekki verið kunnugt um að hópur söngvara ætti að syngja kveðjulag að loknum brekkusöngnum. Segir Árni í yfirlýsingunni að hann hafi ákveðið - sem kynnir - að ljúka dagskránni svo að hópur ungmenna hlypi ekki að sviðinu áður en leifar varðeldsins höfðu verið hreinsaðar. Hann hefði með öðrum orðum tekið völdin í sínar hendur til að afstýra hugsanlegu slysi. Í yfirlýsingunni segir að þegar hann hafi í hita leiksins í þröng á sviðinu þrifið til hljóðnema hefði hann rekist slysalega á Hreim sem kom að hljóðnemanum í sömu mund. Í lokin segir Árni að hann hafi beðið Hreim afsökunar og að full sátt sé um málið milli þeirra. En þessu er Hreimur ekki sammála og segir atvikið einfaldlega ekki hafa verið svona. Aðspurður hvort Árni sé þá að ljúga segist Hreimur ekki ætla að segja meira en þetta. Páll Scheving segir að von sé á yfirlýsingu næstu daga frá nefndinni um atvikið. Aðspurður hvort Árni myndi syngja brekkusöng á þjóðhátíð að ári sagði Páll að málin væru í skoðun. Aðspurður hvort hann ætli að kæra Árna segir Hreimur að hann langi ekki til þess. Þetta sé orðinn nógu mikill baggi á sér og sinni fjölskyldu og söngarinn vill að þessu ljúki. „En ég vil að þessu ljúki ekki í óvissu. Ég vil að hið sanna komi í ljós þannig að enn og aftur: ef það eru til upptökur af þessu - komið þið fram með þær,“ segir Hreimur.