Við munum halda okkar striki

Einn leikur verður á dagskrá Landsbankadeildar karla í knattspyrnu í kvöld, þegar ÍBV tekur á móti Fram á Hásteinsvelli í Vestmannaeyjum. Bæði þessi lið hafa verið í miklu basli í sumar, ÍBV er í næstneðsta sæti deildarinnar með aðeins sex stig úr níu leikjum, en Framarar hafa aðeins náð í tvö stig af átján mögulegum í síðustu sex leikjum sínum eftir prýðilega byrjun á mótinu þar sem þeir unnu meðal annars Eyjamenn 3–0 í fyrri leik liðanna sem fram fór í Laugardalnum. Ólafur Kristjánsson, þjálfari Fram, segir sína menn staðráðna í að krækja í öll stigin í Vestmannaeyjum í kvöld. „Hásteinsvöllur hefur verið erfitt vígi fyrir lið til að sækja stig, en við ætlum okkur sigur engu að síður og það kemur bara í ljós í dag hvort við stöndum við það. Að mínu mati er ekki mikið af hlutum sem þarf að laga í leik liðsins til að fara að ná hagstæðum úrslitum, en það er eitt að tala um það og annað að gera það. Mér finnst líka kominn tími á að þeir sem telja sig stuðningsmenn liðsins fari að mæta á leiki og styðja við bakið á liðinu. Það tekst ekki að bæta árangur liðsins nema með sameiginlegu átaki og ég skora bara á alla þá sem telja sig stuðningsmenn Fram að fara að mæta á völlinn. Það er ekki stuðningsmönnunum að kenna ef liðið nær ekki árangri – en það getur aftur á móti verið þeim að þakka ef liðið nær að snúa við blaðinu," sagði Ólafur. „Við þurfum á öllu okkar að halda á lokasprettinum til að lenda ekki í verulegum vandræðum á þessu móti og það sem mér finnst við einna helst þurfa að laga er að skora meira af mörkum. Við ætlum okkur að taka á því, en ég mun ekki grípa til róttækra aðgerða til að breyta leik liðsins, ég legg upp með ákveðna hluti og við munum halda okkar striki áfram," sagði Ólafur ákveðinn.