Söfnun vegna hamfaranna

Liðlega hundruð tuttugu milljónir króna söfnuðust í landssöfnuninni Neyðarhjálp úr norðri sem haldin var til styrktar fórnarlömbum hamfaranna við Indlandshaf en söfnunin hefur staðið yfir síðastliðið hálft ár. Það voru Barnaheill á Íslandi, Hjálparstarf kirkjunnar, Rauði kross Íslands, SOS-barnaþorpin og UNICEF-Barnahjálp sameinuðu þjóðanna sem fengu það hlutverk að úthluta því sem safnaðist til hamfarasvæðanna. Áður höfðu safnast um hundrað milljónir hér á landi og því má segja að framlag Íslendinga sé rúmlega tvö hundruð milljónir. Hólmfríður Anna Baldursdóttir, upplýsingafulltrúi UNICEF á Íslandi, segir að söfnunin sé umfangsmesta söfnun sem haldin hefur verið hér á landi. "Þetta fór framar okkar vonum en við vissum í raun ekkert við hverju var að búast þannig þetta er afar ánægjulegt. Hjálparstarf og framlög geta áorkað miklu og við viljum hvetja fólk til að gefa áfram til bágstaddra."