Meistarataktar FH í Árbænum

Þó svo að júnímánuður sé ekki liðinn lítur út fyrir að ráðið sé hverjir verði Íslandsmeistarar í knattspyrnu karla í ár. FH-ingar hafa unnið alla átta leiki sína á mótinu til þessa og þann síðasta með því að skora fimm mörk gegn tveimur á heimavelli Fylkis í Árbænum. Fyrirfram var talið að Fylkismenn þyrftu að stöðva FH-inga ef einhver spenna ætti að ríkja við toppinn í sumar og svöruðu Hafnfirðingar því mjög skýrt að þeir ætli hvergi að gefa eftir."Ég hef aldrei lent í því að lenda 4-0 undir eftir hálftíma," sagði Björgólfur Takefusa, annar markaskorara Fylkis eftir leikinn. "Að vinna sig úr því var of mikið í dag, sérstaklega gegn þessu liði."Að klára leikinn eftir það var bara formsatriði og þó svo að Fylkismenn hafi klórað í bakkann í lok leiksins var sigur FH aldrei í hættu. Þess í stað fullkomnaði Allan Borgvardt þrennuna sem var viðeigandi þar sem hann hafði rotað heimamenn með tveimur góðum mörkum í upphafi leiksins. "Þeir eru búnir að vinna alla sína leiki og það verður erfitt að stoppa þá," sagði Björgólfur. "Ég held að þetta sé formsatriði fyrir þá að klára mótið eins og komið er fyrir málunum. Þeir eru með það góðan hóp og mjög vel spilandi lið."Þrjá byrjunarliðsmenn vantaði í lið FH í dag en það kom engan veginn að sök. Liðið spilaði glimrandi góða knattspyrnu."Þetta er ekki bara formsatriði fyrir okkur," sagði Tryggvi Guðmundsson FH-ingur eftir leikinn. "Þetta er snilldarbyrjun og við verðum að halda þessu áfram en það er nóg eftir af mótinu."Um leikinn sagði hann að það hafi verið lagt upp með að klára Fylkismenn snemma. "Við vorum staðráðnir í að byrja vel. Fylkir er mjög léttleikandi lið ef það nær sér á strik. Við ætluðum ekki að gefa þeim tækifæri til þess og var ágætt að vera komnir 3-0 yfir í upphafi leiksins. Þetta gekk allt upp hjá okkur."