Myndir af Saddam valda fjaðrafoki

Bresk og bandarísk dagblöð birtu í gær ljósmyndir af Saddam Hussein í nærfötunum einum klæða, en birting myndanna olli strax miklu fjaðrafoki. Myndirnar kváðu vera teknar fyrir um ári og sýna Íraksleiðtogann fyrrverandi vera að setja plögg af sér í þvottavél þar sem honum er haldið í fangelsi. Forsvarsmenn Bandaríkjahers brugðust ókvæða við og boðuðu flýtirannsókn á því hvernig myndirnar væru til komnar. Talsmenn Alþjóða Rauða krossins sögðu myndbirtinguna hugsanlega brot á Genfarsáttmálanum um meðferð fanga. Að sögn æsifréttablaðanna The Sun í Bretlandi og New York Post í Bandaríkjunum eru myndirnar fengnar hjá ónafngreindum starfsmanni Bandaríkjahers. Myndbirtingin reitti ekki aðeins Bandaríkjaher til reiði, heldur er fastlega búist við því að hún kyndi undir andúð á Bandaríkjamönnum í Írak. Aðallögmaður Saddams, Ziad al-Khasawneh, sagði að lögfræðingateymi hans væri að undirbúa lögsókn á hendur The Sun fyrir að birta það sem hann kallaði "móðgun við mannkyn, araba og írösku þjóðina". "Það sést glögglega að þessar myndir eru teknar innan veggja fangelsisins, sem þýðir að bandarískir hermenn hljóta að hafa tekið þær," sagði al-Khasawneh í símaviðtali við AP. Hann sagði myndbirtinguna þátt í "víðtæku stríði gegn múslima- og arabaþjóðum", ásamt misþyrmingum fanga í Abu Ghraib-fangelsinu í Bagdad, meintri vanvirðingu Kóransins í Guantanamo-fangabúðunum og fleiru. George W. Bush Bandaríkjaforseti tjáði fjölmiðlum í gær að hann teldi slíka myndbirtingu ekki til þess fallna að kynda undir hatri á Bandaríkjamönnum í Írak. "Ég held að ljósmynd sé morðingjum ekki innblástur," sagði hann spurður um viðbrögð við myndbirtingunni á blaðamannafundi með Anders Fogh Rasmussen, forsætisráðherra Danmerkur, sem var í heimsókn í Hvíta húsinu.