Kínverjar gefa Taívönum risapöndur

Kínverjar hafa ákveðið að bjóða Taívönum tvær risapöndur að gjöf. Sérfræðingar segja vart hægt að fá merkilegri gjöf frá Kínverjum, pöndurnar séu tákn um mikinn sátta- og samstarfsvilja. Pöndurnar voru boðnar á síðasta degi sögulegrar heimsóknar taívanska stjórnarandstöðuleiðtogans Liens Chan til Kína. Það er þó ekki enn ljóst hvort Taívanar hyggist þiggja pöndurnar. Kínverjar tíðkuðu það á árum áður að færa fyrirmennum sem komu í opinberar heimsóknir pöndur til að taka með heim. Forseti Íslands sækir Kína heim síðar í mánuðinum en það verður víst að teljast ólíklegt að hann komi til baka með pöndu í farteskinu.