Bannað frá 1970

Jónas Helgason, formaður Æðarræktarfélags Íslands, segir að útflutningur á óhreinsuðum æðardún hafi ekki verið heimill frá 1970 og því sé ekki verið að banna hann í nýju frumvarpi um mat á æðardún. Samkvæmt reglum EES má ekki mismuna dún til innanlands- og utanlandssölu og er því í frumvarpinu ákvæði um að vega og meta dún til sölu innanlands. Jón Sveinsson iðnrekandi hefur haft áhuga á að flytja dún til fullhreinsunar erlendis. Jónas er andsnúinn slíkum útflutningi og segir að dúnninn sé hágæðavara sem sé seld á mun hærra verði en annar dúnn erlendis. "Ef við viljum halda þessum háa gæðastaðli er það grundvallaratriði að halda fullvinnslunni innanlands. Ef við flytjum vinnsluna út þá getum við ekki stýrt verðinu lengur," segir hann. Jón hafnar því að innbyrðis hagsmunatengsl séu milli nefndarmanna, sem undirbjuggu frumvarpið. Hann kveðst hreinsa dún fyrir einn nefndarmanna en nefndarmenn séu skipaðir í nefndina af mismunandi hagsmunasamtökum.