Enn vinnur Renault

Renault-liðið sannaði í gær að árangur liðsins í fyrstu keppnum ársins var engin tilviljun. Spánverjinn Fernando Alonso vann sitt annað mót í röð þegar keppt var í Barein og það sannfærandi. Ferrari reyndi að svara fyrir sig með því að mæta með nýja bílinn í keppnina en hann er greinilega ekki tilbúinn. Nýi bíllinn hjá Ferrari virkaði hraður og Alonso játaði að hann hefði verið hraðari en Renault-bíllinn en endingin var engin því Schumacher þurfti að hætta keppni eftir aðeins ellefu hringi."Við vorum bjartsýnir á að geta klárað keppnina og við verðum klárir í næstu keppni sem er eftir þrjár vikur. Við erum sterkir og munum koma til baka. Ekki hafa neinar áhyggjur af því," sagði Michael Schumacher en hann þótti fela vonbrigði sín vel eftir keppnina en félagi hans, Rubens Barrichello, varð að gera sér áttunda sætið að góðu. "Þetta var heitasti kappakstur sem ég hef tekið þátt í en bíllinn stóð svo sannarlega fyrir sínu," sagði dauðuppgefinn Alonso við blaðamenn en Jarno Trulli á Toyota varð aftur að sætta sig við annað sætið."Bíllinn var góður hjá okkur í dag. Okkur vantaði samt smá orku til þess að ná Fernando og við keyrðum frekar örugglega í annað sætið í stað þess að ná bíl sem er svipaður okkar," sagði Trulli en félagi hans Ralf Schumacher varð fjórði í keppninni.