Höttur vann fyrsta leikinn

Lið Hattar frá Egilsstöðum gerði sér lítið fyrir og sigraði Valsmenn á Hlíðarenda í kvöld í fyrsta leik liðanna um sæti í Úrvalsdeildinni á næsta ári. Leikurinn var æsispennandi allan tímann, en gestirnir frá Egilsstöðum sigu fram úr í lokaleikhlutanum og unnu 87-89. Valsmenn höfðu tækifæri til að jafna leikinn á lokasekúndunum en það tókst ekki og því er Höttur með vænlega stöðu fyrir næsta leik, sem leikinn verður á Egilsstöðum, en það lið sem fyrr vinnur tvo leiki kemst í Úrvalsdeildina næsta vetur. Eugene Christopher var stigahæstur gestanna með 35 stig og Viðar Hafsteinsson skoraði 14, en hjá Valsmönnum var það Steingrímur Ingólfsson sem skoraði mest eða 22 stig.