Engir kynþáttafordómar í Madrid

Forráðamenn Ólympíunefndar Madrídar, sem reyna að fá Ólympíuleikana árið 2012 til borgarinnar, segjast ekki hafa áhyggjur af því að það muni bera á kynþáttafordómum á leikunum, en slíkt hefur hefur ítrekað skotið upp kollinum á Santiago Bernabeu, heimavelli Real Madrid, á undanförnum mánuðum. Nefnd á vegum Alþjóða Ólympíusambandsins, IOC, var um helgina að skoða Madríd og kynna sér hugmyndir Madrídinga um Ólympíuleikana 2012. Hörð samkeppnin bíður Spánverjanna því hinar borgirnar sem eru með í kapphlaupinu eru London, París, New York og Moskva. Eftirlitsmenn IOC eiga eftir að sækja allar þessar borgir heim. "Þetta [kynþáttafordómarnir] hefur aðeins komið einu sinni fyrir", sagði borgarstjóri Madrídar í dag. "Ég hef farið á [Santiago] Bernabeu mörgum sinnum og það [kynþáttafordómararnir] hefur aldrei komið upp". Fullyrðingar borgarstjórans koma þó illa heim og saman við staðreyndir málsins en mikið hefur verið um kynþáttafordóma á leikjum Real Madrid í vetur, en hámarki náðu þó fordómarnir á leik Spánverja og Englendinga þar sem áhorfendur á Bernabeu létu vart þeldökka leikmenn enska liðsins í friði.