Fimmti tapleikur Phoenix í röð

Tíu leikir fóru fram í NBA-deildinni í körfuknattleik í gærkvöldi. Phoenix tapaði fimmta leik sínum í röð þegar liðið beið lægri hlut á heimavelli fyrir Memphis Grizzlies 88-79. Phoenix er ekki lengur með bestan árangur í deildinni því San Antonio hefur náð toppsætinu en liðið vann LA Clippers 80-79. LeBron James varð yngsti leikmaðurinn í sögu NBA að ná þrefaldri tvennu: hann skoraði 27 stig, tók 11 fráköst og átti tíu stoðsendingar. James er 20 ára og tuttuga daga gamall. Cleveland vann Portland 107-101, Lakers vann Minnesota 93-90 án Kobe Bryants, Miami skellti Atlanta 111-92, New Orleans vann Indiana 90-87, Boston stöðvaði sjö leikja sigurgöngu Chicago Bulls með 92-83 sigri, Toronto burstaði New York Knicks 98-81, New Jersey lagði Milwaukee Bucks að velli 96-90 og Philadelphia bar sigurorð af Charlotte 107-105.