Perla Sól skiptir um skóla og er boðin velkomin í fenið á Flórída

Óskar Ófeigur Jónsson skrifar 19. júní 2026 18:01

Perla Sól Sigurbrandsdóttir fær sig frá Louisiana yfir til Flórída. Getty/ Ross Parker

Perla Sól Sigurbrandsdóttir hefur tekið þá ákvörðun að færa sig á milli háskóla í Bandaríkjunum. Hún færir sig frá Louisiana State University til University of Florida.

Emily Glaser, yfirþjálfari kvennaliðs Flórída í golfi, tilkynnti á heimasíðu skólans að Perla Sól hefði gengið til liðs við skólann. Íslendingurinn var hjá LSU á síðasta tímabili, þar sem hún var nýnemi.

„Velkomin í Fenið! Við erum spennt að hafa þig hér,“ segir í tilkynningunni á samfélagsmiðlum.

„Ég valdi Flórídaháskóla vegna frábærra þjálfara og góðs liðsanda. Þetta er sérstakur staður vegna sterkrar hefðar, áherslu á nám og framúrskarandi aðstöðu. Það hefur alltaf verið draumur minn að vera Florida Gator,“ er haft eftir Perlu Sól sjálfri.

Perla hefur unnið stóra titla á Íslandi. Hún varð Íslandsmeistari í golfi árið 2022 og Íslandsmeistari í holukeppni 2023. Hún hefur keppt margoft fyrir lið Evrópu, þar á meðal í Junior Solheim Cup 2024 en Perla varð fyrsti íslenski kylfingurinn til að keppa á mótinu.

Perla Sól Sigurbrandsdóttir fagnaði einnig sigri á Evrópumeistaramótinu í golfi fyrir sextán ára og yngri sem fram fór í Finnlandi sumarið 2022.