Spá enn frekari lækkun vaxta

Greiningardeildir viðskiptabankanna spá því að vextir hjá Íbúðalánasjóði lækki enn frekar og fari jafnvel niður fyrir þá vexti sem viðskiptabankarnir bjóða. Það gæti því stefnt í enn eitt kapphlaup fjármálastofnana um lægstu vextina. Greiningardeildir bankanna byggja spá sína á markaðsvöxtum íbúðarbréfa Íbúðalánasjóðs sem gefa til kynna að við næsta útboð á bréfunum gæti ávöxtunarkrafa eða vaxtaprósenta á lánum sjóðsins orðið 4 prósent eða lægri. Bankarnir bjóða viðskiptavinum sínum íbúðalán með 4,15 prósenta vöxtum. Gangi spáin eftir þurfa bankarnir að taka ákvörðun um það hvort þeir lækki sína vexti og einnig hvort þeir sem nú þegar hafa endurfjármagnað Íbúðalánasjóðslánin sín njóti þeirra kjara. Snorri Jakobsson, hagfræðingur hjá greiningardeild KB Banka, var spurður hvort hann mælti með því að fólk sem íhugaði að endurfjármagnaætti að bíða. Hann segir fólk alltaf taka vissa áhættu. Það sé víst að það borgi sig að endurfjármagna 5,1 prósents lán en ef vextir haldi áfram að lækka geti verið að fólk fái aðeins hagstæðari vexti eftir nokkra mánuði. Ávöxtunarkrafa Íbúðalánasjóðs er vaxtalína fyrir skuldabréf í íslenskum krónum. Því lægri sem hún er þeim mun lægri eru vextir til fólksins í landinu. Lágir vextir geta einnig komið sér vel fyrir bankanna ef þeir þurfa og kjósa að endurfjármagna eigin lán. Snorri segir þó af og frá að bankarnir reyni að tala niður vexti Íbúðalánasjóðs í eigin þágu. Það séu ekki hagsmunir bankanna að ávöxtunarkrafan sé lægri. Koma bankanna inn á íbúðalánamarkað hefur vissulega skilað lægri vöxtum. Vaxtaprósentan hefur farið úr 4,8 prósentum í 4,15 á þremur til fjórum mánuðum. Þannig hefur vaxtaprósentan nálgast það sem gengur og gerist hjá þeim þjóðum sem við berum okkur iðulega saman við líkt og Svíþjóð, þar sem KB banki er með rekstur. Sænskum viðskiptavinum bjóðast lán með 4,3 prósenta vöxtum. Þau eru þó óverðtryggð og telja má ólíklegt að hægt væri að bjóða Svíum upp á verðtryggð lán eins og Íslendingum.