Vilja að Dagur víki sæti sem borgarfulltrúi

Ungir framsóknarmenn krefjast þess að Dagur B. Eggertsson víki sæti sem borgarfulltrúi, þar sem hann sé ekki lengur óháður frambjóðandi. Hann hafi fengið sæti sitt á silfurfati sem fulltrúi óháðra kjósenda en nú séu forsendur fyrir framboði hans brostnar.

Dagur B Eggertsson segist hafa verið hvattur til að fara í framboð og ekki bara af Samfylkingarmönnum. Hann segist ekki taka þessa kröfu alvarlega enda sé hann hvattur áfram af sínum félögum. Þetta sé bara útspil í prófkjörsbaráttu og aðdraganda kosninga. Hann minnir á að meira en helmingur borgarfulltrúa hafi skipt um flokka, eftir umskiptin á vinstri kanti stjórnmálanna þegar Samfylkingin varð til.