Olíufélagið hf. dæmt til að greiða skaðabætur

Olíufélagið hf. var í dag dæmt í Hérðasdómi Reykjavíkur til að greiða fyrrum starfsmanni sínum tæpar fimm milljónir í skaðabætur, sökum vinnuslys sem átti sér stað á einni afgreiðslustöð Olíufélagsins hf. í Reykjavík í apríl árið 2003.

Olíufélagið hf. var dæmt til að greiða konu alls 4.850.924 króna í skaðabætur ásamt vöxtum auk málskostnaðar. Konan var við vinnu sína í afgreiðslu og var að setjast upp á háan stól við afgreiðsluborðið með þeim afleiðingum að stóllinn rann til og hún féll illa niður á flísalagt gólfið og missti meðvitund. Slysið var tilkynnt til lögreglu og Vinnueftirlits ríkisins sem gerði athugasemd um ástand stólsins en á stólnum var hvíldargrind fyrir fætur sem vantaði að hluta. Læknar mátu heilsu konunnar eftir slysið og samkvæmt mati þeirra var varanleg örorka hennar metin 20% vegna slyssins og 10% sem varanlegur miski.

Í dómnum kom fram að starfsfólk afgreiðslustöðvarinnar hefðu margsinnis gert athugasemd vegna stólsins sem þótti ekki vera í lagi en athugasemdir þeirra hefðu verið virtar að vettugi. Lögmaður konunnar hafði áður lagt málið fyrir tjónanefnd tryggingarfélganna og krafist bóta en tjónanefndin komst að þeirri niðurstöðu að Olíufélagið hf. væri ekki bótaskylt.