Landsbankinn lánar öllum sé trygging til

"Ef tryggingar eru í lagi þá fá menn lán hjá Landsbankanum hvort sem þeir eru utan að landi eða úr Reykjavík," segir Ásgeir Friðgeirsson, upplýsingafulltrúi Landsbankans. Eins og fram hefur komið í Fréttablaðinu var írsku stórfyrirtæki hafnað um lán vegna byggingar kalkþörungaverksmiðju á Bíldudal og sögðu forsvarsmenn þess að ástæðan hafi verið sú að fyrirtækið ætti að rísa á landsbyggðinni.

Ásgeir segist ekki geta tjá sig um þetta einstaka mál en sagði þó að umfjöllunin hefði komið Landsbankamönnum á óvart.

Ari Edwald, framkvæmdastjóri Samtaka atvinnulífsins, segir að illt sé ef svo er að ekki fáist lán til verkefna á landsbyggðinni. "Hinsvegar hljóta allir að sjá það að verksmiðjuhúsnæði á höfuðborgarsvæðinu er mun verðmætara en á Vestfjörðum og því betri trygging. Svo er engin skylda hjá einkarekinni lánastofnun að lána og menn geta þá snúið sér til annarar lánastofnunar ef þeim þykir vinnulag einnar ekki vera við hæfi. En mestu máli skiptir þó að það verður að þessari uppbyggingu á Bíldudal að því ég best veit," segir Ari.