Til hagsbóta fyrir þolendur

Ríkislögreglustjóri hefur gefið út verklagsreglur um meðferð og skráningu heimilisofbeldismála hjá lögreglu. Guðmundur Guðjónsson yfirlögregluþjónn segir verklagsreglurnar helst til hagsbóta fyrir þolendur heimilisofbeldis. Einnig auðveldi þær skráningu á brotum sem flokkist undir heimilisofbeldi og valdi því að betri yfirsýn náist yfir þessa tegund brota.

"Þetta eru samræmdar leiðbeiningar fyrir allt landið um hvernig lögreglumenn eiga að bregðast við í slíkum útköllum," segir Guðmundur.

"Tekin hafa verið af öll vafaatriði um hvað teljast megi heimilisofbeldi því það hefur nú verið skilgreint. Til þessa hefur leikið vafi á því hvað flokka megi sem heimilisofbeldi," segir Guðmundur. Hann bendir á að samkvæmt skilgreiningunni í verklagsreglum nái heimilisofbeldi ekki aðeins yfir ofbeldi sem gerist inni á heimilinu sjálfu heldur hvers kyns ofbeldi sem fórnarlambið verður fyrir af fjölskyldumeðlimi eða tengdum aðila.

Í reglunum segir: Forsenda fyrir skráningu máls sem heimilisofbeldi er að gerandi og þolandi séu nákomnir, það er skyldir eða tengdir. Heimilisofbeldi eru brot framin innan veggja heimilis eða á öðrum stað þar sem skyldir og tengdir dvelja eða hittast fyrir.