Tekið fyrir um miðjan nóvember hið fyrsta

Jón Magnússon, lögmaður Fréttablaðsins, bíður enn eftir því að stefna Jónínu Benediktsdóttur gegn blaðinu fyrir að birta upplýsingar úr tölvupósti, og lögbann við birtingu frekari upplýsinga, verði tekin fyrir í Héraðsdómi.

Jónína Benediktsdóttir stefndi Fréttablaðinu fyrir að birta upplýsingar úr einkatölvupósti hennar sem blaðið hafði undir höndum. Jónína krefst fimm milljóna króna í miskabætur og að Kára Jónassyni, ritstjóra Fréttablaðsins, verði gerð ítrasta refsing fyrir að birta upplýsingar úr gögnunum sem sýslumaðurinn í Reykjavík gerði upptæk fyrir nokkrum vikum. Í stefnunni er auk þess krafist að lögbann við birtingu tölvupósts Jónínu verði staðfest, svo og sú ákvörðun sýslumanns að gera gögnin upptæk.

Að sögn Jóns Magnússonar, lögmanns Fréttablaðsins, er málið enn í biðstöðu. Hann hafi skrifað dómsstjóra bréf þar sem hann óskaði þess að málinu yrði hraðað og fékk þau svör að dómari yrði settur í málinu um næstu mánaðamót. Ef sá dómari verður ötull, eins og Jón orðaði það, þá má búast við að málið verði í fyrsta lagi tekið fyrir um miðjan nóvember.