Ekki hærri í rúm þrjú ár

Vextir óverðtryggðra lána eru hærri nú en þeir hafa verið síðan í maí árið 2002. Lægstu vextir eru nú tólf prósent og hafa hækkað um 50 prósent á sextán mánuðum.

Viðskiptabankarnir hafa allir hækkað vexti á óverðtryggðum lánum í kjölfar stýrivaxtahækkunar Seðlabankans í síðasta mánuði. Nú er svo komið að lægstu vextir óverðtryggðra lána eru 11,95 prósent en hæstu vextirnir 12,95 prósent. Þar með er þó ekki öll sagan sögð því ofan á þetta bætist vaxtaálag. Það er misjafnt eftir lánum og lánþegum en getur orðið allt að fimm og hálft prósent. Því getur fólk orðið að greiða allt að 18,3 prósenta vexti af óverðtryggðu lánunum sínum. Lægstu vextir samkvæmt ákvörðun Seðlabanka eru tólf prósent og hafa hækkað um fjögur prósentustig síðan í ágúst í fyrra. Vextirnir hafa ekki verið hærri en nú síðan þeir voru þrettán prósent í maí tvö þúsund og tvö.

Yfirdráttarlánin hafa líka orðið dýrari að undanförnu þrátt fyrir að það komi ekki í veg fyrir að aukin eftirspurn er eftir þeim. Nú eru vextir af yfirdráttarlánum á bilinu nítján til tuttugu prósent. Miðað við að meðalheimilið skuldaði 600 þúsund krónur í yfirdráttarlán í ágústmánuði þarf hvert heimili að borga 120 þúsund krónur í vexti á ári.