Unnið að stefnumörkun

"Stefnumörkun er í gangi þessa dagana og enn á eftir að ganga frá ýmsum lausum endum," segir Gísli Tryggvason, nýskipaður talsmaður neytenda. Rúmur mánuður er síðan Neytendastofa tók formlega til starfa fyrsta sinni en talsmaður neytenda heyrir undir hana. Að sögn Gísla hefur starf hans hingað til borið keim af því að um nýtt embætti er að ræða og því í mörg horn að líta áður en farið verður að taka við beiðnum eða athugasemdum frá almenningi en engin slík erindi hafa enn borist. "Starfið snýst um að marka stefnu í samráði við Neytendastofu og eins munum við starfa í samstarfi við Neytendasamtökin þegar fram líða stundir. Það er mikilvægt að finna strax farveg svo kraftarnir nýtist í þeim málum sem stærst og mikilvægust eru." Jóhannes Gunnarsson, formaður Neytendasamtakanna, segir starfsemi sinna samtaka verða eins og verið hefur þrátt fyrir tilkomu Neytendastofu. "Það hefur farið fyrir brjóstið á okkur að hvorki Neytendastofa né embætti talsmanns neytenda munu ekki leiðbeina eða aðstoða þá neytendur sem vita ekki rétt sinn en það er stór og dýr málaflokkur hjá okkur þannig að við störfum áfram eins og verið hefur ótrauð."