Settu innsigli á stofnanir og fyrirtæki

Óháður hópur ungra kvenna heimsótti í nótt stofnanir og fyrirtæki og setti innsigli á aðalinngang þeirra til þess að hvetja þau til að rjúfa það sem hópurinn nefnir innsiglað misrétti kvenna.

Í tilkynningu frá hópnum segir að sjálfar hafi konurnar, sem allar eru í kringum þrítugt, upplifað misrétti eftir að þær fóru út í atvinnulífið og telja þær það gífurleg vonbrigði að sjá hversu skammt á veg jafnrétti sé komið. Eftir útskrift frá Háskóla Íslands hafi komið í ljós að fyrrverandi bekkjabræður þeirra hafi verið með töluvert hærri laun og meiri fríðindi en þær. Þetta telja þær óviðunandi og vilja sjá breytingar sem fyrst.

Hópurinn innsiglaði fyrirtækin og stofnanirnar með táknmynd heillar krónu sem hvatningu um að borga konum í heilum krónum í stað konukróna. Í morgun hafi starfsmenn svo þurft að rjúfa innsiglið með táknrænum hætti til að geta hafið störf. Meðal þeirra fyrirtækja og stofnana sem konurnar heimsóttu voru höfuðstöðvar stjórnmálaflokkanna, ýmis ráðuneyti og bankar.