Kvartað yfir óþrifnaði

"Ástandið er algjörlega óviðunandi því það er svo illa ræstað í skólanum og fólk er nú alveg búið að fá nóg," segir Marinó Björnsson, stundakennari í Hvaleyrarskóla í Hafnarfirði. Þar í bæ hefur verið kvartað í fjölmörgum skólum vegna slæmrar ræstingar. Marinó segir að miklir samskiptaörðugleikar geri ástandið enn erfiðara en ræstitæknarnir kunna fæstir íslensku eða ensku.

Fyrirtækið Sólar sér um ræstingarnar í þeim skólum en það gerði samning við Hafnarfjarðarbæ fyrir rúmu ári en nú hefur Einar Ólafsson, framkvæmdastjóri Sólar, afhent Lúðvíki Geirssyni bæjarstjóra uppsögn á samningnum.

"Við ræstum í samræmi við það sem samið var um við Hafnarfjarðarbæ, við höfum á að skipa mjög góðu fólki og þetta hefur allt farið rétt fram af okkar hálfu," segir Einar.

Hann segir hins vegar að Hafnarfjarðarbær hafi verið ósamvinnufús og því hafi fyrirtækið ákveðið að segja samningnum upp. Málið verður tekið fyrir í bæjarstjórn fljótlega í þessari viku.

Kolbeinn Gunnarsson, formaður Verkalýðsfélagsins Hlífar, segist vonast til þess að ræstingarnar verði aftur í höndum bæjarstarfsmanna. Verkalýðsfélagið rekur nú mál fyrir fyrrverandi starfsmann Sólar sem segist hafa fengið þriðjungi lægri laun hjá fyrirtækinu en hjá Hafnarfjarðarbæ fyrir sömu vinnu.

Félagsdómur vísaði málinu frá og segir Kolbeinn að það sé nú í vinnslu hjá lögmönnum en hugsanlega fari það fyrir héraðsdóm.