Dræmar viðtökur hjá Samfylkingu

Steingrímur J. Sigfússon, formaður Vinstrihreyfingarinnar græns framboðs, lýsti þeirri skoðun sinni og forystumanna flokksins í ræðu á landsfundi fyrir helgi að vilji hans og annarra stæði til þess að myndað yrði rauðgrænt kosningabandalag að norskri fyrirmynd fyrir næstu alþingiskonsingar.

Vísaði Steingrímur þar í nýja vinstri stjórn í Noregi og biðlaði til Samfylkingarinnar um þátttöku í slíku bandalagi.

Ágúst Ólafur Ágústsson, varaformaður Samfylkingarinnar, virðist ekki deila þessum draumi með Steingrími og segir allt tal um myndun hugsanlegs kosningabandalags ekki eiga sér stoð í sögunni hérlendis. Flokkarnir verði hver og einn að fara í gegnum kosningar áður en niðustaða þeirra verði nýtt í myndun ríkisstjórnar. Flokkarnir tveir eigi um margt sameiginleg baráttumál en þó sé enn langt á milli þeirra í evrópumálum og afstöðu til atvinnulífsins.