Strætókort til vinnu og skóla

Gjaldskrárhópur Strætó bs. vinnur að útfærslu vinnustaðakorta, sem fyrirtæki geta keypt fyrir þá starfsmenn sína sem nota þennan samgöngumáta, að sögn Ásgeirs Eiríkssonar framkvæmdastjóra. Þegar hafa verið gefin út skólakort sem gilda í níu og hálfan mánuð. Þau eru handhafakort, sem kosta 25.000 krónur.

"Við munum kynna vinnustaðakortin um áramótin," segir Ásgeir: "Hugsanlega vilja vinnuveitendur taka þátt í fjármögnun kortsins fyrir starfsmenn. Áætlað er að gefa út sex mánaða kort, sem verða gefin út á nafn, með mynd af viðkomandi. Ekki er ljóst hversu mikið þau munu kosta, en gjaldskrárhópurinn er að vinna að þeirri ákvörðun þessa dagana."

Ásgeir segir, að vegna þeirrar umræðu sem orðið hafi í Hlíðahverfinu um umferðarmál megi benda á að þegar stofnleiðir ­Strætó­ bs., sem eru sex talsins, hafi verið skipulagðar hafi markmiðið með þeim verið að flytja íbúa milli fjölmennustu íbúasvæðanna og fjölmennustu atvinnu- og þjónustusvæðanna.

"Þess vegna fara þær langflestar fram hjá Hlíðahverfinu því þær eru þá á leiðinni út á Landspítala, út í háskóla og í miðborgina," segir Ásgeir.

"Ástæðan fyrir því að við gerum þetta svona er einmitt sú, að rannsóknir á vettvangi almenningssamgangna benda til þess að gæði felast í því að þurfa ekki að skipta milli vagna. Þá er sá samhljómur milli allra niðurstaðna slíkra rannsókna, að fólk er frekar reiðubúið til að legga á sig lengri göngu að biðstöðinni ef það veit að það fær tíða þjónustu og kemst stystu leið."