Fram náði í stig á síðustu stundu

Framarar náðu jafntefli á Fylkisvelli í gær með marki fyrirliðans Ríkharðs Daðasonar í uppbótartíma en þetta var fyrsta mark liðsins í 282 mínútur. Fram að því virtist sem mark Björgólfs Takefusa frá því í fyrri hálfleik myndi duga Fylki til að vinna þriðja leikinn í röð. Leikurinn í Árbænum fór mjög rólega af stað og var nánast ekkert í gangi fyrsta halftima leiksins. Fylkismenn áttu þó ágætis samspil sín á milli og voru beittari til að byrja með. Eftir að þeir komust yfir með hörkuskoti Björgólfs Takefusa á 39. mínútu tóku þeir lífinu af fullmikilli ró og spilamennska liðsins í seinni hálfleik var ekki upp á marga fiska. Þeir virtust vera að bíða allan seinni hálfleikinn eftir því að leikurinn fjaraði út en þegar þrjár mínútur voru komnar yfir venjulegan leiktíma var þeim refsað af Ríkharði Daðasyni sem jafnaði fyrir Fram af stuttu færi eftir að heimamönnum mistókst að hreinsa boltann í burtu. Frömurum hefur gengið erfiðlega að skora í undanförnum leikjum og allt leit út fyrir þriðja leikinn í röð þar sem þeim tækist ekki að koma boltanum í mark mótherjanna þegar Ríkharður skoraði. Hann átti einnig hættulegasta færi Fram í fyrri hálfleik þegar hann skaut í þverslána beint úr aukaspyrnu. Þórhallur Dan Jóhannsson var að finna sig vel á Fylkisvellinum og átti góðan leik fyrir Framara. Þá verður Víðir Leifsson að fá sinn skammt af hrósi en leikur þeirra bláklæddu breyttist mikið eftir að hann kom inn á sem varamaður. „Fyrri hálfleikurinn hjá okkur var ekki nægilega góður og við vorum hræddir við að spila en í hálfleik fengum við smá yfirhalningu og allt annað var að sjá til okkar í seinni hálfleik. Við sýndum baráttu og vilja og náðum að koma þeim út úr spilinu. Þar að auki fáum við meira þor og náum að setja pressu á þá. Viljinn dugði svo til að við næðum þessu mikilvæga stigi,“ sagði Ríkharður Daðason, fyrirliði Fram, eftir leikinn en hann vonast til að vera kominn af stað. „Ég held að ég hafi aldrei áður spilað fimm leiki í röð án þess að skora þannig að ég vona að þessu sé lokið.“