Millifærði þýfi inn á tvo einkareikninga

Þær rétt rúmu tvær milljónir króna, sem 25 ára maður er grunaður um að hafa stolið úr heimabönkum fjögurra einstaklinga fóru inn á tvo reikninga sem eru í eigu hans, samkvæmt upplýsingum Fréttablaðsins. Maðurinn sem handtekinn var fyrr í vikunni situr í gæsluvarðhaldi og sætir yfirheyrslum.

Um er að ræða fjögur þjófnaðarmál, eins og Fréttablaðið greindi frá í gær. Fyrsta og stærsta upphæðin sem stolið var með þessum hætti úr heimabanka nam um það bil 1,5 milljónum króna. Sá þjófnaður átti sér stað í lok sumars. Síðasta málið af þessu tagi kom upp í fyrri viku, þegar millifærðar voru 100 þúsund krónur úr heimabanka ungs manns. Þær upphæðir sem stolið var í þessum fjórum málum fóru í öllu tilvikum inn á reikninga mannsins sem nú situr í gæsluvarðhaldi.

Meðal þess sem Lögreglan í Reykjavík rannsakar nú er hvaða aðferðir hafi verið notaðar til að komast inn í heimabanka þeirra sem stolið var frá. Beinast sjónir einkum að aðferð sem notuð er í útlöndum þar sem tölvuþrjótar búa til lítil forrit sem þeir fela á heimasíðum. Ef tölvunotandi fer inn á þá heimasíðu, fer forritið yfir á tölvu hans, liggur þar í leyni, fylgist með því ef farið er inn á netbanka í tölvunni, skráir hjá sér aðgangsorð og lykilorð og sendir svo sjálft sig til baka með þeim upplýsingum. Þetta er svokallaður "trójuhestur," sem kom við sögu í þjófnaðarmálunum.

Hörður Jóhannesson yfirlögregluþjónn í Lögreglunni í Reykjavík vísaði í gær á bug fréttum í fjölmiðlum þess efnis að maðurinn sem situr í gæsluvarðhaldi sé milliliður sem hafi millifært fjármuni yfir á reikning þriðja aðila. Hörður sagði, að yfirheyrslur yfir honum stæðu yfir og meðan rannsókn málsins væri ekki lokið myndi lögreglan ekki tjá sig um einstök efnisatriði þess.