Vill að íslenskir friðargæsluliðar sinni borgaralegri friðagæslu

Framkvæmdastjóri Hjálparstarfs kirkjunnar segir að það skapi hættu fyrir hjálparstarfsmenn þegar friðargæsluliðar sinna neyðar- og þróunaraðstoð eins og íslenskir friðargæslumenn gera í Afganistan. Hann segir það skoðun sína að Íslendingar eigi fremur að leggja áherslu á borgaralega friðargæslu en vopnaða.

Í Afganistan voru til skamms tíma tveir sjö manna hópar íslenskra friðargæsluliða. Annar hópurinn var kallaður heim vegna öryggisleysis í norðanverðu landinu. Jónas Þórisson hefur meira en þriggja áratuga reynslu af hjálparstörfum. Í viðtali við Þór Jónsson á NFS í hádeginu í dag sagðist hann ósáttur við það hlutverk vopnaðra friðargæsluliða að kanna þörf fyrir aðstoð í Afganistan. Jónas segir þá sem bera vopna vera vel búna og vel þjálfaða en þeir séu fyrst og fremst að sinna öryggismálum. Hann segir að sumir séu þeirrar skoðunnar að þeir eigi að fara um sveitir, bæi og byggðir og finna verkefni fyrir hjálparstofnanir en hins vegar megi spyrja sig að því hvort þeir séu hæfari til þess en þaulvant hjálparstarfsfólk með mikla reynslu. Jónas telur að hjálfarstarfsstofnanir séu almennt miklu hæfari til að skilgreina verkefni heldur en óreyndir friðargæsluliðar frá Íslandi.

Í skriflegu svari á Alþingi fyrir rúmum 2 árum við fyrirspurn Þórunnar Sveinbjarnardóttur sagði þáverandi utanríkisráðherra Halldór Ásgrímsson; "Verksvið íslensku friðargæslunnar erskilgreint sem þátttaka Íslendinga í friðarverkefnum með borgaralegu framlagi íslenskra sérfræðinga eða starfsmanna á sem breiðustum grundvelli. Síðan þá hafa vopnaðir hópar einkennisklæddra Íslendinga verið hið sýnilega andlit friðargæslunnar."Jónas segir það sína skoðun að leggja ætti áherslu á borgaralega friðargæslu líkt og sjá megi á Sri Lanka eða aðstoð við stríðandi aðila að lægja deilur og leggja niður vopn.Hann segir að íslendingar ættu að einbeita sér að því að fá stríðandi öfl til að koma að samningaborðinu og mynda frið eins og til dæmis á Sri Lanka þar sem Norðmenn áttu þátt í því að stilla til friðar, í stað þess að vera að taka þátt í friðargæslu meðal vopnaðra friðargæsluliða. Jónas segir það vera sína skoðun á málinu.

Í dag kom enn einu sinni í ljós hversu hættuleg friðargæslan er í Afganistan þegar 6 manns særðust í sprengingu sem var beint gegn ítölskum friðargæsluliðum í borginni Herad. Þrír ítalskir friðargæsluliðar og þrír óbreyttir borgara særðust, þeirra á meðal kona sem er í lífshættu á spítala.