Ólafur Páll er sá hættulegasti

Hættulegasti sóknarmaður Landsbankadeildar karla í sumar er ekki annar af markahæstu mönnum deildarinnar, Tryggvi Guðmundsson eða Allan Borgvardt, né heldur Guðmundur Benediktsson sem er sá leikmaður sem hefur lagt upp flest mörk í fyrri umferðinni. Efstur á palli hvað varðar tíðni mili skapaðra marka er nefnilega 23 ára vængmaður úr toppliði FH. Ólafur Páll Snorrason kemur best út úr tölfræðinni og er marksæknasti leikmaður Landsbankadeildar karla miðað við spilatíma en mótið er nú rétt rúmlega hálfnað. Það líður minnstur tími milli skapaðra marka hjá honum en Ólafur Páll hefur fengið að taka þátt í 6 af 10 leikjum liðsins í sumar. Í þessum 6 leikjum hefur Ólafur Páll komið að sex mörkum, skorað tvö þeirra sjálfur og lagt upp önnur fjögur til viðbótar fyrir félaga sína í FH-liðinu. Ólafur er rétt á undan hinum fjölhæfa Fylkismanni Hrafnkeli Helgasyni sem hefur komið að fimm mörkum Árbæjarliðsins en hann hefur spilað í jafnlangan tíma og Ólafur. Hörð samkeppni um stöður Ástæða þess að Ólafur Páll hefur ekki spilað meira er fyrst og fremst gríðarlega hörð samkeppni um stöður í hinu öfluga og taplausa liði FH en Hrafnkell hefur hins vegar verið að glíma við erfið meiðsli sem hafa meðal annars kostað hann tvo síðustu leiki Fylkisliðsins. FH-ingar eru mjög áberandi á listanum og fjórir Hafnfirðingar eru meðal sex efstu manna. Í þriðja sætinu er annar leikmaður FH-liðsins sem er í svipaðri stöðu og Ólafur Páll. Atli Viðar Björnsson hefur átt þátt í fjórum mörkum á þeim 220 mínútum sem hann hefur spilað en það fer þó ekki framhjá neinum að mennirnir í 4. (Tryggvi) og 6. sæti (Borgvardt) á þessum lista eiga mikinn þátt í afrekum Ólafs Páls og Atla Viðars en enginn leikmaður Landsbankadeildarinnar hefur átt þátt í fleiri mörkum í sumar en einmitt þeir tveir. Allan hefur komið að 12 mörkum FH og Tryggvi einu færra en Tryggvi er sem stendur markahæsti leikmaður deildarinnar með 9 mörk. Ólafur Páll hefur nýtt sér það vel að Jón Þorgrímur Stefánsson meiddist í leik gegn Skagamönnum í 7. umferð en Jón Þorgrímur hefur verið fyrsti maður í stöðu hægri vængmanns í FH-liðinu síðustu árin. Ólafur Páll er hins vegar á sínu fyrsta ári í Hafnarfirði og hann hefur í kjölfar meiðsla Jóns Þorgríms byrjað tvo síðustu leiki FH-liðsins. Ólafur hefur í þeim leikjum skorað eitt mark og lagt upp annað fyrir félaga sína í framlínunni og báðir hafa leikirnir unnist eins og allir aðrir leikir FH-liðsins í Landsbankadeildinni í sumar. Var ekki hópnum í 3 leikjum Ólafur Páll kom inn á sem varamaður í þremur fyrstu leikjunum og lagði þá upp tvö mörk en var síðan ekki í hópnum í þremur leikjum í röð í síðasta mánuði. Ólafur Páll lét þó ekki deigan síga og hefur vakið mikla athygli fyrir góða frammistöðu í tveimur síðustu leikjum þar sem hann hefur í fyrsta sinn fengið að spreyta sig í byrjunarliðinu.  Fæstar mínútur milli skapaðra marka í landsbankadeildinni:1. Ólafur Páll Snorrason, FH 40,0 mínútur (2 mörk skoruð og 4 undirbúin á 240 mínútum) 2. Hrafnkell Helgason, Fylki 48,0 (4 mörk skoruð og 1 undirbúið á 240 mínútum) 3. Atli Viðar Björnsson, FH 55,0 (1 mark skorað og 3 undirbúin á 220 mínútum) 4. Tryggvi Guðmundsson, FH 71,8 (9 mörk skoruð og 2 undirbúin á 790 mínútum) 5. Guðmundur Benediktsson, Val 72,3 (2 mörk skoruð og 8 undirbúin á 240 mínútum) 6. Allan Borgvardt, FH 71,8 (8 mörk skoruð og 4 undirbúin á 876 mínútum) 7. Stefán Örn Arnarsson, Keflavík 74,2 (3 mörk skoruð og 2 undirbúin á 371 mínútum) 8. Christian Christiansen, Fylki 73,3 (1 mark skorað og 2 undirbúin á 220 mínútum) 9. Björólfur Takefusa, Fylki 83,8 (5 mörk skoruð og 3 undirbúin á 670 mínútum) 10. Guðmundur Steinarsson, Keflavík 86,5 (5 mörk skoruð og 5 undirbúin á 865 mínútum)