Segir ferjusiglingar leggjast af

"Veginum vestur á Barðaströnd hefur verið haldið opnum síðastliðna tvo vetur og samkvæmt vegalögum á ríkið ekki að styrkja ferjusiglingar þar sem heilsársvegur er," segir Jón Rögnvaldsson vegamálastjóri. Jón bendir á að hlutar af veginum vestur séu ekki orðnir góðir enn og því hafi verið ákveðið að draga smám saman úr þátttöku ríkisins í ferjusiglingum yfir Breiðafjörð næstu fimm ár. "Hins vegar er ekki þar með sagt að ferjusiglingar séu úr myndinni," segir Jón. "Einkaaðilar mega vitaskuld gera út ferju." Pétur Ágústsson, framkvæmdastjóri Sæferða, sem gerir út ferjuna Baldur, telur hins vegar að ferjusiglingar yfir fjörðinn muni leggjast af hætti ríkið þátttöku sinni. "Þær bera sig kannski á sumrin en fráleitt að vetrarlagi," segir Pétur sem telur það mikla afturför í samgöngum ef áform ríkisins verða að veruleika. "Þótt við höfum verið heppin með færðina síðastliðna tvo vetur koma alltaf erfið tímabil þar sem fólk verður að treysta alfarið á ferjuna. Flutningabílar til dæmis, sem þurfa að koma farmi í flug á réttum tíma, stóla á okkur langan part úr vetri." Guðmundur Guðlaugsson, bæjarstjóri Vesturbyggðar, telur það munu hafa talsverð áhrif á sveitarfélagið leggist ferjusiglingar af yfir vetrartímann. "Miðað við óbreytt ástand er ljóst að samkeppnishæfni sjávarútvegsfyrirtækja á svæðinu mun skerðast, þar sem þau reiða sig á ferjuna til að koma ferskri vöru á áfangastað á veturna. Eins yrðu áhrifin á íbúana þónokkur. Við erum eins og eyland þegar það er snjóþungt og þótt snjór hafi verið lítill undanfarið, hefur hálka verið áberandi og gert landleiðina erfiða yfirferðar." Ferjan Baldur siglir í Flatey á Breiðafirði en Jón segir að á meðan föst búseta er í eyjunni verði samgöngum þangað haldið úti, þó í annarri mynd til dæmis með smærri bátum.