Enn engin svör vegna meints fangaflugs

Íslenskum stjórnvöldum hafa enn engin svör borist frá bandarískum stjörnvöldum vegna fangaflugsins svokallaða. Halldór Ásgrímsson segir aldrei spurt um farþega í vélum sem hér fari um í borgaralegu flugi. Aðalatriðið nú sé hvort ólögleg fangelsi finnist í Evrópu.

Halldór Ásgrímsson forsætisráðherra segir enn ekkert svar hafa borist frá bandarískum stjörnvöldum varðandi draugaflugið svokallaða og millilendingar slíkra flugvéla hér á landi á leið með fanga til meintra leynilegra fangelsa í Evrópu. Hann á þó von á því að eitthvert svar muni berast.

Halldór segir stóru spurninguna nú hins vegar snúast um rannsókn Evrópusambandsins á því hvort fangelsi sem starfi utan alþjóðasáttmála og laga séu á starfssvæði þess. Haft var eftir Halldóri í fréttum Ríkissjónvarps síðastliðin föstudag að fréttir af borgaralegu flugi með slíka fanga væru enn sem komið er sögusagnir. Hann vísaði því sömuleiðis á bug að yfirflugsheimildir í tengslum við innrásina í Írak veittu Bandaríkjamönnum þessa heimild.

Aðspurður hvort til greina kæmi að endurskoða yfirflugsleyfi fyrir einkaflugvélar af þessu tagi eða fara betur ofan í saumana á þessum málum sagðist Halldór telja að málið væri alþjóðlegt og því þyrfti að ræða það í alþjóðlegu samhengi.