Sjómenn hafa varað við ­ódýru erlendu vinnuafli

"Líklega eru komin ein 10 til 15 ár síðan við vöruðum við því að ásókn í ódýrt erlent vinnuafl myndi færast upp í land," segir Birgir Hólm Björgvinsson, stjórn­ar­maður í Sjómannafélagi Reyk­ja­víkur, en félagið var í far­ar­broddi í baráttu við að fá íslenska kjarasamninga um borð í kaupskipum sem hér voru skráð.

"Bíðið þið bara rólegir, þetta flæðir upp bryggjurnar, sögð­um við, en það var bara hlegið að okkur. Við vorum alltaf að reyna að fá samstöðu hjá ASÍ og fleirum, en töluðum fyrir daufum eyrum."

Meðal forsenda þess að kjara­samningum yrði ekki rift um síð­ustu mánaðamót var að lög yrðu sett um starfsmannaleigur, en málefni erlendra starfsmanna hafa um skeið verið til sérstakrar skoðunar hjá verkalýðsfélögunum.

Birgir segir margt líkt með þeim málum sem sjómenn voru að fást við og starfsmannaleigunum sem verkalýðsfélög fást nú við.

"Þetta voru náttúrulega erlend skip og þeir með láglaunasjómenn, allt niður í 50 dollara á mánuði og voru að rífa af okkur plássin. Síðustu 10 ár hafa fleiri hundruð íslenskir farmenn misst störf sín."

Birgir, sem er gjaldkeri Sjó­manna­félagsins og Jónas Garðars­son formaður hafa verið í forystu þeirra sem "tekið hafa slaginn" um gildi íslenskra kjarasamninga hér og hjá íslenskum fyrirtækjum.

"Það þarf að hreyfa aðeins við þessari ASÍ-mafíu, enda er þetta alveg handónýtt batterí," segir Birgir og kveður það skoðun sína að sjómenn ættu að slíta sambandi við Alþýðusambandið.

"Við get­um alveg staðið á eigin fótum, enda þýðir ekkert að hengja sig í álit einhverra lögfræðinga og hagfræðinga sem öllu ráða hjá ASÍ. Það er bara handaflið sem virkar. Við höfum langlengst komist á því hjá Sjómannasambandinu að ­­stöðva­­­ bara skip og láta okkur í léttu rúmi liggja þótt við fáum á okkur her lögfræðinga sem kvarta yfir aðgerðunum. Við höf­um líka haldið þó nokkru af okkar mönnum, enda vitað að við erum til í aðgerðir. Við vorum líka alveg tilbúnir að fara upp að Kára­hnjúk­um með rútu af 50 til 100 körl­um og stoppa þetta bara. En menn vilja bara frekar sitja við kjafta­borðið."

Birgir vildi þó árétta að ekki væru allir ónýtir til kjarabaráttu innan Alþýðu­sambands­ins. "Krist­ján Gunnars­son, for­mað­ur Starfs­greina­sambands­ins og for­mað­ur Verka­lýðs- og sjó­manna­félags Kefla­víkur, hefur staðið eins og klett­ur við hliðina á okkur, ekki síst í baráttunni úti í Njarðvík þar sem við höfum stoppað nokkur skip."