Niðurstaðan áhyggjuefni segir menntamálaráðherra

Einn af hverjum fimm framhaldsskólanemendum sem þreyttu samræmt stúdentspróf í stærðfræði síðastliðið vor skiluðu auðum eða alröngum úrlausnum.

Síðastliðið vor voru samræmd stúdentspróf í stærðfræði og ensku lögð fyrir framhaldsskólanemendur í fyrsta sinn en prófað hafði verið í íslensku á þennan máta tvisvar áður. Breytilegt var hve margir þreyttu prófin síðasta vor en nemendur þurfa aðeins að hafa lokið tveimur samræmdum prófum til þess að geta útskrifast úr framhaldsskóla. Þá er ekki gerð krafa um tiltekinn árangur á prófunum til að af útskrift geti orðið heldur eingöngu að nemendur mæti í prófin og sitji við í eina klukkustund.

Meðaleinkunn í íslenskuprófinu var 4,9, í ensku var hún 6,2 og aðeins 3,3 í stærðfræðiprófinu. Annar einkunnastigi var þó hannaður fyrir þessi próf og samkvæmt upplýsingum frá Námsmatsstofnun ber því að varast að leggja svipaða merkingu og venja er í einkunnarskalann 1-10.

Mikla athygli vekur að af þeim rúmlega 653 nemendum sem þreyttu stærðfræðiprófið skiluðu 49 nemendur auðum prófheftum og 99 fengu lægstu mögulegu einkunn, sem samtals gerir tuttugu og tvö prósent nemenda. Þá skiluðu 6,5 prósent nemenda auðum íslenskuprófum og tæp þrjú og hálft prósent nemenda skrifuðu ekki staf á enskuprófinu, að undanskildu nafninu sínu.

Þorgerður Katrín Gunnarsdóttir menntamálaráðherra segir það áhyggjuefni að einn af hverjum fimm framhaldsskólanemendum skuli ýmist skila auðu blaði í stærðfræðiprófinu eða alröngum úrlausnum. Ljóst sé að Námsmatsstofnun þurfi að fara gaumgæfilega yfir málið. Aðspurð hvort samræmdu stúdentsprófin séu ekki andvana fædd segir Þorgerður það annað mál. Hún ítrekar að þau hafi verið sett á laggirnar samkvæmt lögum sem sett hafi verið árið 1996 og enginn þingflokkur andmælti. Síðan þá hafi þó margt gerst en skoðað verði málefni framhaldsskólanna í heild eins og verið sé að gera varðandi breytta námskipan og styttingu námsins.