Stórleikur KR og Vals í bikarnum

Dregið var í gær í fjórðungsúrslit í Visa-bikarkeppni karla. Tvö stærstu liðin í pottinum, FH og Valur, mætast ekki nú en Valsmenn fá það erfiða verkefni að heimsækja KR í Vesturbæinn á meðan að FH-ingar taka á móti bikarstemningsliðinu ÍA. Eins og svo oft áður í bikardráttum var fyrst og fremst horft til þess að fá heimaleik. Flestir fyrirliðar liðanna og þjálfarar voru sammála um að andstæðingurinn skipti minna máli á þessu stigi keppninnar en heimaleikjarétturinn þeim mun mikilvægari. Þá skiptir einnig máli að leikirnir í fjórðungsúrslitum keppninnar verða þeir síðustu sem fara fram á heimavöllum liðanna, héðan í frá fara leikirnir fram á Laugardalsvelli. Sterkasti heimavöllur landsins er án efa Kaplakriki í Hafnarfirði þó svo að FH-ingar virðist vera jafnsterkir á útivelli. Liðið sem fékk það miður öfundsverða hlutverk að mæta FH í Hafnarfirði eru Skagamenn, sem hefur oft gengið betur í deildinni en nú í sumar. "Já, þetta var nú ekki léttasta verkefnið sem hægt var að fá," sagði Gunnlaugur Jónsson, fyrirliði ÍA, eftir útdráttinn. "En ef liðið ætlar sér bikarmeistaratitilinn yfir höfuð þarf að vinna FH rétt eins og önnur lið. Það var óheppni að leikurinn fari fram á þeirra heimavelli en svona er þetta í bikarnum. Þetta verður vissulega erfiður veggur að klífa en við ætlum okkur sigur í þessum leik og ekkert annað." Þannig er málunum háttað með flest lið - þau leggja nú allt kapp á gott gengi í bikarnum þar sem FH virðist í algerum sérflokki í deildinni og aðeins Valur í þeirri aðstöðu að eiga möguleika á að ógna þeim. Kr er eitt þeirra liða sem hefur ekki unnið bikarinn síðan 1999. Þeir mæta nú Völsurum. "Við höfum einmitt verið að ræða þetta. Við ætlum að leggja enn þá meiri kraft í bikarinn enda verðum við ekki Íslandsmeistarar í ár. Ég held að allir sjái það," sagði Kristján Finnbogason fyrirliði KR. Í öðrum leikjum tekur 1. deildarlið HK á móti Fylki og Fram mætir ÍBV.