Bannað að tala við íslendinga

Pólskum verkamönnum á Kárahnjúkasvæðinu var bannað að hafa samband við íslenska samstarfsmenn sína. Þetta segir Oddur Friðriksson, trúnaðarmaður starfsmanna. Hann segir fulltrúa starfsmannaleigunnar 2 B, sem flytur inn pólska verkamenn til vinnu við Kárahnjúka og víðar, hafa sagt verkstjóra Suðurverks að berja Pólverjana sýndu þeir mótþróa í vinnu. Fulltrúi starfsmannaleigunnar hótaði Pólverjunum ýmsum refsingum ef þeir ekki stæðu sig í vinnu og einnig að allar skemmdir sem þeir hugsanlega ynnu, líka óviljandi, myndu þeir vera látnir borga. Samkvæmt Oddi var Pólverjunum einnig ráðlagt að gefa sig ekki að Íslendingum því að þeir fyrirlitu Pólverja og líti á þá sem drykkjurúta og þjófa. Málið er til skoðunar hjá trúnaðarmanni.