Drógu gula ýsu

„Menn rak bara í rogastans enda aldrei séð svona lagað áður," segir Ingvar Pétursson, skipstjóri á trillunni Hlökkur frá Hólmavík, en áhöfnin dró einn gulan á dögunum.Það er varla í frásögu færandi að draga þann gula en þá er venjulega átt við þorsk. Menn þurfa þó að endurskoða þá málvenju því sá guli að þessu sinni var ýsa. Fyrir utan að vera öðruvísi á litinn var ýsan einnig frábrugðin að því leyti að hún var ekki með svarta blettinn sem þjóðsagan hermir að venjuleg ýsa hafi fengið í útistöðum við tröllkonu. „Það var enginn tröllablettur á þessari heldur aðeins svartir blettir hér og þar svo hún var nokkuð afbrigðileg," segir skipstjórinn sem hefur sett ýsuna í frysti ef einhver skyldi hafa áhuga á því að rannsaka hana.