Vilhjálmur Þ. með forystuna

Skoðanakönnunin sýnir að Vilhjálmur Þ. Vilhjálmsson hefði fengið meirihluta atkvæða, eða sextíu og þrjú komma fjögur prósent, ef gengið hefði verið til atkvæða dagana tólfta til átjánda október. Gísli Marteinn Baldursson hefði hinsvegar fengið þrjátíu og sex komma sex prósent. Vilhjálmur virðist auka við sig fylgið milli vikna því að skoðanakönnun sem gerð var vikuna á undan sýndi að hann hefði fengið rúmlega sextíu og tvö prósent atkvæða og Gísli Marteinn tæplega þrjátíu og átta prósent atkvæði ef gengið hefði verið til atkvæða þá vikuna. Þetta eru niðurstöður skoðanakönnunar sem gerð var dagana fimmta til átjánda október. Úrtakið var Reykvíkingar á aldrinum sextán til sjötíu og fimm ára og var svarhlutfallið um sextíu og þrjú prósent. Fjöldi svarenda voru fimm hundruð og tóku þrjúhundruð sextíu og sex afstöðu. Rúmlega eitthundrað svarenda hefðu kosið Sjálfstæðisflokkinn ef gengið hefði verið til kosninga þegar könnunin var gerð. Rúmlega helmingur þeirra, eða fimmtíu og fjögur prósent, hefðu stutt Vilhjálm Þ. Vilhjálmsson í fyrsta sæti á lista flokksins en fjörutíu og sex prósent Gísla Martein Baldursson. Rétt er að geta þess að þessar tölur eru byggðar á mjög fáum svörum og vikmörkin því afar há. Könnunin var gerð fyrir stuðningsmenn Vilhjálms Þ. Vilhjálmssonar. Prófkjör Sjálfstæðisflokksins fer fram dagana fjórða til fimmta nóvember.