Skorið úr um málið í Haag

Samtök norska sjávarútvegsins eru óvænt fylgjandi því að alþjóðadómstóllinn í Haag verði látinn skera úr um rétt Norðmanna til að stjórna einhliða fiskveiðum á fjölþjóðlega hafsvæðinu við Svalbarða. Undirbúningur íslenskra stjórnvalda fyrir málshöfðun á hendur Norðmönnum fyrir dómstólnum er nú á lokastigi.  Það er Reidar Nilsen, formaður Norges Fiskarlag, sem segir í viðtali við Aftenposten að réttast sé að láta alþjóðadómstólinn skera úr um málið svo Norðmenn liggi ekki stöðugt undir ámæli frá Íslendingum, Rússum og Evrópusambandslöndum fyrir að stjórna veiðum á hafsvæðinu að eigin geðþótta. Það verði að fá úr því skorið hvernig málið standi gagnvart þeim mörgu þjóðum sem standa að Svalbarðasamningnum svonefnda, en í raun eiga aðildarríkin, þeirra á meðal Ísland, sama rétt á svæðinu þótt Norðmönnum hafi á sínum tíma verið falið eftirlit og umsjón með eyjunum. Í Noregi er það nú rifjað upp að fyrir ellefu árum hafi norska strandgæslan beitt íslenska togarann Björgúlf EA fullri hörku vegna meintra ólöglegra veiða á svæðinu og fært hann til hafnar í Noregi þar sem skipstjóri og útgerð hlutu þungar sektir, en nú láti strandgæslan rússneska togrann Electron sleppa fyrir mun alvarlegra fiskveiðibrot, og mannrán til viðbótar. Kunnugir í Noregi segja að það sé fyrirlsáttur að hafa kennt vondu veðri um hvernig til tókst. Þetta lykti af því að norsk stjórnvöld séu að mismuna þjóðum á svæðinu. Íslensk skip hættu síldveiðunum á svæðinu í fyrrahaust eftir að vera búin að veiða kvótann, sem Norðmenn höfðu úthlutað einhliða, af ótta við að verða tekin fyrir fiskveiðibrot og hljóta dóma í Noregi. Í framhaldi af því ákváðu íslensk stjórnvöld að hefja undirbúning að málssókn gegn Norðmönnum fyrir alþjóðadómstólnum og er sá undirbúningur á lokastigi, þannig að ekkert ætti að vera að vanbúnaði að hefja lögsóknina, en ákvörðun hefur ekki enn verið tekin um það.