Hlekkjuðu sig við vinnuvélar

Átján erlendir mótmælendur stöðvuðu vinnu hluta starfsmanna við Kárahnjúkavirkjun um rúmar tvær klukkustundir í gær með því að fara í óleyfi fótgangandi inn á vinnusvæðið og hlekkja sig við vinnuvélar og leggjast í veg fyrir vinnutæki. Lögreglan á Egilsstöðum fjarlægði mótmælendur. Þrettán voru handteknir mótspyrnulaust en áður en lögreglan kom höfðu fimm þeirra horfið af vettvangi. Helgi Jensson, fulltrúi sýslumannsins á Seyðisfirði, segir óljóst hvaða eftirmálar verði af aðgerðunum en það ráðist meðal annars af því hvort Impregilo leggi fram kæru. Ómar R. Valdimarsson, talsmaður Impregilo, segir líklegt að kæra verði lögð fram. "Við munum fara yfir þetta mál og athuga hvort hægt sé að grípa til fyrirbyggjandi aðgerða svo að atvik af þessu tagi endurtaki sig ekki," segir Ómar. Birgitta Jónsdóttir, einn talsmanna mótmælendanna í tjaldbúðunum við Kárahnjúka, segir íslenska tjaldbúðafólkið ekki hafa staðið fyrir mótmælunum en þeir útlendingar sem tóku þátt í þeim gisti þó í tjaldbúðunum. "Þarna eru allir á eigin vegum en mér persónulega finnst ekkert athugavert við aðgerðir af þessu tagi svo fremi að ekki hljótist mannskaðar af," segir Birgitta.