Yngsti lifrarþegi landsins

Yngsti lifrarþegi landsins, tæplega eins árs drengur, er á batavegi eftir erfiða aðgerð þar sem grædd var í hann lifur úr móður hans. Foreldrar drengsins segja of algengt að ættingjar þurfi að taka ákvörðun um líffæragjöf aðstandenda en um fjörutíu prósent hafna beiðni um slíkt.

Huginn Heiðar Guðmundsson er með alvarlegan lifrarsjúkdóm sem heitir Risafrumulifrarbólga.

Frá fyrsta degi hefur líf hans snúist um þrotlausa bið, baráttu, rannsóknir og sjúkrahúsvist. Í vor var Huginn Heiðar fluttur til Bandaríkjanna í því skyni að fá nýja lifur. Öðruvísi næði hann ekki bata. Ekki var hægt að bíða þess að lifur fengist eftir hefðbundnum leiðum en svo heppilega vildi til að móðir Hugins þótti ákjósanlegur lifrargjafi svo hún gat gefið drengnum sínum hluta af sinni lifur og bjargað þannig lífi hans.

Foreldrar Hugins, Þau Fjóla Ævarsdóttir og Guðmundur Guðbergsson, segja víða pott brotinn í varðandi líffæragjafir í íslensku samfélagi. Allt of algengt sé að ættingjar taki ákvörðun um líffæragjöf, en um 40% hafna beiðni um slíkt. Þá segja þau of flókið fyrir fólk að láta vilja sinn til líffæragjafar í ljós.

Huginn Heiðar er á batavegi þótt hann dvelji enn á spítala. Hann hlýðir á klassíska tónlist á meðan hann braggast, æfir sig í að borða eins og venjulegur maður og fagnaði sinni fimmtu tönn í gær.